Ինչպես սնվել Ամանորյա տոների ընթացքում
31/12/2019 16:46

Ինչպես սնվել Ամանորյա տոների ընթացքում

Գաղտնիք չէ, որ ավանդական դարձած համեղ ուտելիքները Ամանորի և Սուրբ Ծննդյան տոների մասն են կազմում։ Քաղցկեղ ունեցող մարդիկ հատկապես ուշադիր պետք է ընտրեն այս օրերի իրենց սննդակարգը, քանի որ երբեմն դժվար է լինում դիմակայել հայկական հյուրասիրությանը։ Ստորև կնշենք որոշ խորհուրդներ, որոնք կարող են օգտակար լինել քաղցկեղի բուժում ստացող անձանց համար․

    • Խուսափեք ալկոհոլից՝

    1. եթե գտնվում եք ակտիվ բուժման փուլում (քիմիաթերապիա, իմունաթերապիա, ճառագայթային թերապիա, վիրահատություն); 

    2. եթե վերջին երկու շաբաթվա ընթացում ստացել եք քիմիաթերապևտիկ բուժում;

    3. եթե ունեք լյարդի և մարսողական այլ օրգանների խնդիրներ։

    • Խուսափեք անհայտ ծագման մսամթերքից։ Հյուրասիրվելիս խուսափեք աղացած մսով պատրաստված ուտեստներից։ 

    • Խուսափեք հեշտ փչացող մթերք օգտագործելուց, այդ թվում՝ մայոնեզ և թթվասեր պարունակող աղցաններից։

    • Խուսափեք թուրինջից կամ թուրինջի հյութից, եթե Ձեր վերջին քիմիաթերապևտիկ կուրսից չի անցել առնվազն երկու շաբաթ։

    • Խուսափեք կծու, թթու, յուղոտ մթերքից։

    • Սնվեք տանից դուրս գալուց առաջ։ Այդպես կիջեցնեք դրսում կասկածելի սնունդ օգտագործելու հավանականությունը։

Սրտխառնոցի դեպքում

    • Խուսափեք կծու, յուղոտ մթերքից;

    • Խուսափեք շատ քաղցր մթերքից;

    • Խուսափեք սննդի մեծ չափաբաժիններից;

    • Խուսափեք ճաշի ընթացքում քաղցր հեղուկներ խմելուց;

    • Մի ընդունեք հորիզոնական դիրք սնվելուց հետո առնվազն երեք ժամվա ընթացքում։

Փորկապության դեպքում

    • Օգտագործեք բուսական բջջանքով հարուստ մթերք (թարմ մրգեր, բանջարեղեն և այլն);

    • Խմեք մեծ քանակությամբ հեղուկներ;

Փորլուծության դեպքում

    • Խուսափեք յուղոտ կամ տապակած սննդամթերքից;

    • Խուսափեք կաթնամթերքից;

    • Խուսափեք կոֆեին պարունակող հեղուկներից;

    • Խմեք մեծ քանակությամբ ջուր և էլեկտրոլիտներ պարունակող հեղուկներ;

    • Սննդակարգից հանեք բջջանքով հարուստ մթերքը կամ օգտագործեք լավ լուծվող բջջանք պարունակող մթերք (բանան, բրինձ, սպիտակ հաց, խնձորի խյուս):      

Համի փոփոխությունների դեպքում

    • Պահպանեք բերանի խոռոչի հիգիենան;

    • Կատարեք բերանի խոռոչի ողողողումներ (կերակրի սոդա, երիցուկի թուրմ և այլն);

    • Սննդում ավելացրեք բուսական համեմունքներ;

    • Օգտագործեք թարմ մրգեր։

Ամանորը նաև հին սովորություններին հրաժեշտ տալու հիանալի առիթ է։ Փորձեք սահմանել նոր, առողջարար սննդակարգ Ձեզ համար։

Նյութը պատրաստեց Մարինե Ռուշանյանը